Zanzibar Daima

WAZANZIBARI NA MAFUTA YAO, WATANGANYIKA NA MADINI YAO!!

Licha ya kuwa suala la uchumi si la Muungano, lakini zile nyenzo zote za kuusimamia na kuuendesha uchumi huo zimehodhiwa na kudhibitiwa na Serikali ya Muungano – kodi, mikopo, biashara ya nje, uwekezaji, na sasa hata hili suala la uwezekano wa kuwepo kwa nishati ya mafuta. Ni wazi basi, kwamba kama Wazanzibari hawakujikaza, itafika siku Zanzibar itakuwa haina tena lake wala chake. Msimamo ufuatao, uliotolewa na wajumbe wa Baraza la Wawakilishi la Zanzibar ni muhimu kwa khatima ya Zanzibar na lazima tuunge mkono…

“TPDC (Shirika la Maendeleo ya Mafuta la Tanzania), chombo ambacho kilianzishwa mwaka 1969 kikiwa si chombo cha Muungano na mpaka hivi leo hakijawa chombo cha Muungano, lisijishugulishe kabisa na masuala ya mafuta Zanzibar. Badala yake, Zanzibar nayo ianzishe kampuni yake iitwe Zanzibar Petroleum Development Corporation (ZPDC). Hii (ZPDC) ijishughulishe na utoaji wa leseni na usajili wa makampuni na shughuli nzima ya utafutaji na uchimbaji wa mafuta kwa Zanzibar. Utaratibu utafanywa ionekane kwamba kampuni yetu ZPDC inashirikiana na TPDC katika ama masuala ya kimataifa au masuala mengine, lakini bado Zanzibar iwe na kamandi ya kutosha katika masuala mazima ya mafuta. ” – Said Ali Mbarouk

“…Hata misguiding inatokea. Bahati mbaya siye tumepewa muda mdogo, lakini mimi nimetazama humu kwenye ile ripoti ya Antrim, imeandikwa kuwa TPDC ni kitengo cha Muungano. Iko wapi TPDC (kwenye Mambo ya Muungano?), lakini kwenye ripoti imeandikwa. Kwa hivyo kuna mambo mengi, kama tutayapitia, yametajwa kuwa ni ya Muungano wala si ya Muungano. Na ile lugha ilitomika vile vile katika kurekebisha TPDC, hata kama tungekuwa twataka (hilo la TPDC na mafuta kuwa jambo la Muungano, tuseme), lakini haiwezekani to employ, to change to nini… Kitu kama hichi ambacho si cha Muungano, lazima utumie neno lenye uzito unaofaa – restructuring. Sisi tunasema, kama mafuta yapo ni yetu, kama hayapo basi. Tunasamehe!” - Rashid Seif Suleiman

“….Suala la mafuta si suala la Muungano, kwanza. Na katika masuala haya, Articles of Union ni International Agreement ambayo kiilivyo Mkataba huu ni mkubwa kuliko hiyo Katiba ya Jamhuri ambayo imeambiwa isitiwe mkono au katiba nyengine yoyote katika nchi husika kwa ule Mkataba wake. Kwa hivyo, ninaamini kabisa ingelikuwa ni vyema ukaangaliwa ule Mkataba – ambao bado unawekwa siri, sijui kwa sababu zipi – akapewa huyo mshauri, akajuwa kwamba hayo mambo yenyewe yakoje katika suala hili, ili akaona kazi yake inarahisika vipi. Kama mfano ambao Mhe. Rashid ameutoa, huwezi kwenda mahala pana foundation imejengwa ya nyumba pengine very simple, ukaambiwa ujenge sky scraper. Huo usalama utakuweko wapi?” – Zakia Omar Juma

“Sasa suala linakuja: hapa ndipo hadaa ilipotumika katika Muungano. Katika Muungano wa 1964 ulipofanyika, ilichukuliwa ile Katiba ya Tanganyika ikarekebishwa ili kutoa nafasi kwa Zanzibar nayo kuwemo. Sasa nadhani hii ni wrong. Miye nadhani, kama hata hayo makubaliano yatakuwepo, basi sheria iandikwe upya na sio ukachukua sheria ya upande mmoja, ukairekebisha ifanye kazi pande mbili. That is wrong!” – Haji Faki Shaali

“Sasa katika nchi hii, hakuna mtu wala chombo chenye mamlaka ya kubadilisha Mkataba wa Muungano. Makubaliano ya Muungano ni makubaliano ya nchi mbili. Wanaobadilisha ni wale wale ambao waliounda Mkataba wa Muungano. Si chombo. Bunge la Jamhuri ya Muungano, kisheria, halina mamkala ya kubadilisha Articles of Union. Baraza la Wawakilishi halina mamlaka ya kubadilisha Articles of Union. Articles of Union hubadilishwa na wale wale ambao walianzisha Articles of Union, nchi mbili Tanganyika na Zanzibar. Kwa hivyo, mambo yote yale ambayo Bunge lilichukuwa mamlaka ambayo si yake ya kuingiza mambo katika Articles of Union kuwa ni ya Muungano, mimi nasema yale yote ni batili na hatuyakubali.” – Soud Yussuf Mgeni

 

“Kila nchi ilikuwa na ghala yake. Waheshimiwa, waasisi wa Muungano huu, wakachukua mambo kutoka ghala moja ya kila nchi – mambo 11 – wakayaweka katika ghala moja. Mheshimiwa, kutokea hapo kila kinachochukuliwa kutoka ghala moja, ni kutoka ghala ya Zanzibar na linaingizwa katika ghala ya Muungano kiasi ambacho sasa yamefikia mambo 23 wa ushei. Ninavyoona mimi ni kwamba itakuja siku ghala yetu haina kitu kwa sababu kila kinachochukuliwa, kinachukuliwa kutoka kwetu…” – Hamad Masoud Hamad

“Lakini hata tuseme – na mimi nakataa – kwamba suala na mafuta na gesi ni suala la Muungano. Sasa kama hivyo ndivyo, mbona katika ripoti hizi au ushauri huu tunaopewa, haujazungumzia chochote kuhusu gesi? Na kwa nini hawa wenzetu wakakarupuka tu wakasema sisi tunataka kuwe na mshauri elekezi ambaye atazungumzia mgawanyo wa mapato ya uchimbaji na utafutaji wa mafuta? Ni kwa sababu mafuta haya yanatoka Zanzibar tu lakini kwa gesi ambayo haiko Zanzibar hawashughuliki? Hicho ni kitawi kimoja tu ambacho nahisi kuna ajenda ya siri; na ajenda ya siri yenyewe ni dhahiri kwa sababu ikiwa gesi ambayo karibu tangu 2000 inachimbwa na inatumiwa kwenye viwanda – ripoti niliyonayo ni kwamba takriban viwanda 20 hivi sasa katika Bara wanatumia gesi inayochimbwa katika maeneo mengine. Fedha ambazo zimeshakusanywa ni zaidi ya shilingi bilioni 100. Sasa kama kweli hili ni suala la Muungano, kwa nini hawa wenzetu hawakusema kwamba suala hili nalo liingizwe katika mchakato huu, likazungumziwa suala la mafuta ambayo hata kuanza kuchimbwa hayajachimbwa? – Aboubakar Khamis Bakary

“Basi miye naomba, wataalamu mumwambie mtaalamu alokuja: Zanzibar hata kama mafuta ni kinibu ni ya Wazanzibari. Waandishi habari waambieni huku katika magazeti ya kesho, kwamba wawakilishi wa Wazanzibari, wa wananchi wa Zanzibar, nchi ya Zanzibar, mafuta yao hawataki, ni ya Wazanzibari kwa ajili yetu tuliopo hivi sasa, watoto wetu wetu walioko nyuma yetu, wajukuu wetu wajao, vitukuu, vilembwe, vinying’inya mpaka Zanzibar itakapokwisha. Wasije wakatugeuza Nigeria, vita vya kila siku. Hatuviwezi wala hatuvitaki. Siye ni wachache na watuwache na utajiri ambao Mwenyezi Mungu atatujaalia.” – Najma Khalfan Juma

Chanzo: http://hakinaumma.wordpress.comTAFADHALI BONYEZA HAPA KUCHANGIA MAONI YAKO. UNASHAURIWA KUANDIKA MADA YA KILE UNACHOKICHANGIA.